*PRISPALJI

U jedan dec vode razmuti se friški kvas (1 kockica), jedna mala zličica cukra jedna mala zličica brašna. Sve se ostavi na teplomu mistu da se digne.
U jednu malo širju teču stavi se po kila brašna i u sredini brašna napravi se jamica. U jamicu se ulije jedan dec mlake vode, jedna jušna zlica maslinovoga ulja i dva prstohvata soli. Ako se kvas dosta diga i on se ulije u jamicu. To se sve pomalo pomiša s brašnon. Tisto se misi s rukama i ostavi se jednu uru na teplomu mistu kisati. Kad ukisa, tisto se rukama razvuče u male okrugle pljosnate bubice (jedna po jedna). Frigaju se na prsuri na već ugrijanomu maslinovu ulju. Frigaju se kratko minut, dva na jednon i minut, dva na drugon strani. Kad su gotove, pospemo ih cukron.

*SUHA OBOTNICA S JAJIMAN

Obotnica se rasplati i očisti se frbok (glava). Šuši se pet, šest dan na buri. Traci obotnice se istuču macolicon da malo omekšaju. Izrižu se nožen na male komadiće (1–2 centimetra). U malo višju prsuru ulije se maslinovo ulje, da pokrije dno i nasicka se jedna sridnja kapula i dva češnja luka češnjaka. Kad kapula zažuti doda se  obotnica, te se malo prži u prsuri (10 minuti). Doda se malo isickanog petrusimena i malo papra. (U novije vrime i zličica vegete), a soli ako triba, možda čak i ne jer je obotnica suha i slana. Na kraju se sve to prelije s četiri do pet istamperanih jaj.

*BRUDET OD ŠUŠENIH MOLI S KUMPRILMAN

Moli se rasplatu i izvadi se sridnja kost. Šušu se na buri pet, šest dan. U jednu sridnju teču ulije se maslinovo ulje da pokrije dno. U teču se stavu  dvi sridnje sitno nasickane kapule i dva, tri nasickana češnja luka češnjaka, dodade se po kila moli izrizanih  na fete (3 – 4 cm široke), dva, tri sridnja kumprila isrizana na fete. Doda se malo papra, malo paprikaša, (u novije vrime dvi zličice vegete), soli ako triba, petrusimena, nite, jušna zlica kvasine i  po jušne zlice kuserve (koncentrat od rajčice u konzervi). To se sve dobro izmiša  drvenon zlicon i ulije se vode naraz ribe. Kuva se otprilike po ure na laganom ognju. Kad zakuva, kuva se pet minuti na na jačem i još po ure na laganom ognju.

*JEZERSKI ZELENJAK

U dva deca mlake vode izmrvi se jedan friški kvas (kockica), doda se jedna zličica brašna i jedna cukra. Ostavi se na teplomu mistu da se digne.
U jednu širju zdilu stavi se jedan kil brašna i u sredini brašna napravi se jamica, u koju se ulije dignuti kvas, dva, tri prstohvata soli i jušna zlica maslinovoga ulja. To se sve misi  rukama. Doda se još malo mlake vode ako triba. Tisto se stavi kisati po ure. Ukisano tisto se podili na dva dila i svaki dija se razvuče po stolu (stol mora biti pobrašnen) u veličini luštijere, a debljine oko  jedan i po do dva centimetra. Jedan dija se stavi u luštijeru namazanu maslinovim uljemn i nadije se nadivon: tri do četiri jabuke izregetane, šaku suhih grožđic, nasickati dva do tri rukoveta blitve, jednu šaku nasickanih orihov, tri šake cukra, 1 dec maslinovoga ulja, malo nite, nesickanog petrusimena i poljskoga luka. Sve se to izmiša i stavi na tisto koje je već u luštijeri. Drugi dija tista se stavi priko toga. Krajevi  donjega i gornjega tista se malo  zavrnu. Stavi se peći na 180 C  oko po ure. Vidi se da je gotovo kad se gornja kora malo zarumeni.